Ora nyana ora ngira Randa kulon Nglurung

Atine Prastawa goreh. Ora nyana ora ngira kalamun kang diayunake ramane iku ora liya randha kulon lurung kang jeneng Andri.
Piye anggone bakal nembung wong wadon kang ditresnani mau.
Prastawa sasat ana tengah protelon dalan kang mbingungke.
Dalan siji kudu ngestoake ngandikane ramane kanthi nglamar Andri dijaluk supaya dadi ibune kuwalon.

Dalan sijine dalan kang dikarepake bakal nglamar kanggo Prastawa dhewe.
Pancen Prastawa nduweni niyat bakal nglamar wong wadon mau kanggo dheweke.
Niyat mau bakal dikandhaake marang ramane .Nanging durung kawetu niyat mau diblakaake marang ramane ,kasaru ramane menehi parintah supaya nglamar randha Andri mau kanggo dheweke.
Pingin rasane mbalik wae .Nanging Prastawa ora bakal iku dilakoni.Watak prawira kang wus mbalung sumsum ana kapribadene kang ora gelem dheweke mlayu mbalik .

Kayangapa kudu ditengenake watak prawira mau.
Dheweke wus nduweni niyat bakal ngorbanake rasa tresnane marang randha Andri mau kanggo kamulyane ramane.
Prastawa pancen bocah kang nduweni watak satriya.Ngabekti marang wong tuwa tansah ditengenake.
Apa maneh dheweke wus prasetiya marang ramane kalamun saguh dadi minangka sesulih kanggo nglamar wong wadon kang denayunake Margijono Atem ramane mau.

" Pripun nggih anggen kula badhe ngomong ..... !" kandhane Prastawa nalika tekan omahe randha Andri ana dina sesuke sakwuse dheweke denutus ramane.

" Kok kadhingaren kandhamu mlipis ta mas ....?" pitakone randha Andri marang wong lanang mau.Padatane anggone caturan wong loro mau ngoko wae amarga wus rumaket banget.Senajan durung kaweta kandha tresna ing antarane kekarone ,nanging kabeh wus ngrasa kalamun ing antarane ana rasa tresna kang kapendhem.

"Sayektinipun kula ewed badhe kandha mring ndika. Kula akeni kalamun manah kula mboten sarujuk,nanging dospundi malih......?"

"Iki ana apa taa........?
Sajake kok ana kang nyalawadi.......?"

Andri wiwit krasa ana sing nyalawadi marang Prastawa.
Ora kaya padatan anggone jejagongan nganggo basa alus bocah iku.
Senajan umure luwih enom ,nanging Prastawa mau wis dianggep kanca raket.Palah kena diarani pacangane.Senajan durung ana tembung tresna kang kawetu.

"Nyuwun aksama nggih Bu......!"

" Kok Bu ta....padatan An ngono wae taa.....?"

" He he he.....ngapunten ...kula badhe pitaken dipunkeparengaken nggih.....?"

" Oleh wae ...waton aku bisa aweh wangsulan....."

" Panjenengan sumerep lelampahanipun Dewabrata..... ?"

" Yaa. ....aku weruh .Bisma putrane Prabu Sentanu iku taa.....?"

" Inggih....pripun pemanggih panjenengan....?"

" Bhisma satriya kang utama.Wani ngorbanke awake kanggo nyenengake wong tuwane .Aku kanyungyun banget marang watak mangkono mau.Merga kanggo nyenengake wong tuwa dheweke sumpah ora bakal rabi lan bakal ndhepani negara nganti tumekaning tetese getih pungkasan,oncate nyawa...."

" Menawi panjenengan manggihi satriya ingkang mekaten ing jaman samangke ,panjenengan napa ngluputaken.....?"

"Babar pisan ora.........!
Kepara aku kayungyun banget marang pakerti kang mangkono mau.....!
Ana apa ta iki....?
Pitakonmu kok aneh.......?"

" He he he.....amung pitaken kemawon ....!"

" Iki mesthi ana kang kok singidake.....?"

" Umpami panjenengan manggihi saestu pawongan jaler ingkang kados Bhisma ing jaman samangke .......?"

" Mesthi bakal takuber ......hehe...!"

" Lire...........?"

" Bakal takajak rabi.....he he....."

" Lamun pitambakipun mboten purun lantaran sumpahipun.....?"

" Saora orane aku bakal manut klawan dheweke senajan aku ora bisa nduweni.Merga aku banget kayungyun marang bebudene......!
Ana apa taaa.........?"

" Kula amung pingin wanuh mring watak panjenengan.....?"

" Kanggo apa.......?"

" Kula gadhah pepinginan panjenengan dados tiyang ingkang tansah caket kaliyan kula.....!"

" Ooo...ngono ta....hehehe....!
Apa wis kok pikir kanthi tenan.......?
Aku iki randha anak siji......?"

" Pramila kula pitaken kaliyan panjenengan kalawau......?"

" Gandheng cenenge apa......?"

" Kula kepingin sumerap watak saha kapribaden panjenengan.....?"

" Yen wus mangerteni njur kepriye..... ?"

"Jebul ...pancen mbokmenawi jodho.....!"

" Iyaa.....ngono iku watakku mangkono kok.........!
Aku seneng banget klawan bebudene Bhisma.Watak satriyane pantes tinulad.Lamun ana wong lanang saiki kang mangkono mau ,aku bakal setiya marang wong lanang mau....he he.....!"

"Senajan pungkasane mboten saged nyawiji.....?"

" Ora apa apa.....jer bisa nuruti marang wong lanang mau ,wus cukup kanggoku .Wujud tresnaku marang dheweke......!"

" Umpami wekdal samngke wonten.....?"

" Bakal taklakoni.....hehe...karo maneh mokal banget kalamun ana .Ora ana saiki anak kang ngalah marang wong tuwane .Sing ana suwalike... Wong tuwa kang kudu ngalah....he he.....!"

"Estu nggih.......?"

" Iyaaaa....lamun ana, aku pingin weruh.....?"

" Bakal nuruti kekarepanipun tartamtu nggih.....?"

" Iyaaa..........!!"

"Kalamun niku kula......?"

"Haaah.........!"
Andri mlongo.Ora ngira babar pisan Prastawa bakal kandha mangkono.
Kagete tansaya nemen sakwuse Prastawa crita marang dheweke yen Margijono Atem ramane pingin ngrabi dheweke.
Lan ngonkon supaya Prastawa anake nglamarake.

Andri ngira lamun iku gojegan wae .Nanging Prastawa sajae temenan.
Andri dhewe pancen wis ngira kawit mau ana keanehan anggone jejagongan klawan Prastawa .Anggone basa mlipis ora kaya padatan ngemu surasa kang wigati.
Lan dumadi beneran.
Andri dhewe sabenere uga weruh lamun Margijono Atem ramane Prastawa kawit mula nduweni rasa marang dheweke.Katitik anggone pingin oleh kawigaten saka dheweke lan tansah memungsuhan klawan Subroto.

Randha kulon lurung mau saiki tansaya bingung.
Amarga mau sarana geguyonan kandha marang Prastawa bakal sumadya nuruti apa kekarepane .
Ora ngira kalamun Prastawa nduweni watak kang mangkono.
Wani kelangan,ngorbanake katresnane merga netepi watak satriya kang wus sumpah marang wong tuwane.


Dening Jlitheng Basuni

(Ana Candhake)