Tembang Iringan Sujud Sapto Darmo

Asmorondono Tembang Iringan Sujud Sapto Darmo

• Den taliti siro kaki,
• Sujud iro maring Allah,
• Ywo kongsi kleru patrape,
• Lenggah trapsilo kang toto,
• Mangetan madhepiro,
• Yekti iku paring pemut,
• Kawitan tesing manungso.

• Lenggah ing mori kang putih,
• Yekti iku ngemu roso,
• Sucekno pribadi-to ngger,
• Aywo kongsi kalepetan,
• Marang pikir kang olo,
• Kang karyo ndheg-ndhegi laku,
• Sujud iro mring Hyang Kwoso.

• Ponang ulo-ulo neki,
• Reksane ywo kongsi owah,
• Datan keno menglang mengleng,
• Yen lamun datan mangkono,
• Yekti akaryo wirang,
• Tan kasil nggeniro ngangsu,
• Tirto sarining agesang.

• Hamirsanono ing ngarsi,
• Sak meter tebihing tingal,
• Saking badaniro kiye,
• Margo ngemu roso mulyo,
• Cahyaning katentreman,
• Nggampilken laku nireku,
• Mberat sakehing pangroso.

• Kantuno roso kang keri,
• Naliti lakuning roso,
• Kang dumunung sarandune,
• Hangganiro sadaya-nyo,
• Ywo supe napas-iro,
• Aturen kang nganti alus,
• Sasat kadyo tan ambegan.

• Barang gawe dipun eling,
• Nganggowo tepo saliro,
• Parentah kang sabenere,
• Ojo ambeg kumawoso,
• Amrih den wedenono,
• Dene yen wong wis linuhung,
• Nggone amengku mring bolo.

Pucung Tembang Pengiring Sujud Sapto Darmo

• Poro wargo iku, Samyo penggalian sujud,
• Sanyoto miguno,
• Tumraping lahir lan batin,
• Sujud asal mulo dumadi manungso.

• Sujud iku, bekti mring Hyang Moho Agung,
• Wajibing manungso,
• Ing alam ndonyo puniki,
• Eling urip asihe Hyang Moho Koso.

• Lamun Sujud, bekti mring Hyang Moho Agung,
• Iku purnawiro,
• Kasiram ing toyo sari,
• Wusanane pribadi manggih raharjo.

• Lamun Sujud, roso tentrem ginayuh,
• Minongko tuodho,
• Gesang ing bebrayan sami,
• Manggih mulyo ing madyo lawan wusono.

• Lamun Sujud, sirno pikir kang semrawut,
• Biso jembar padhang,
• Pamikir teguh nyawiji,
• Gegayuhaning teteg tutug tumoto.

• Lamun Sujud, waras wiris lan rahayu,
• Wit pangaribowo,
• Dayaning pruwito sari,
• Ing priyonggo manggih seger kesarasan

• Lamun Sujud, ngusadani tambah patut,
• Tetulung sapodho,
• Manggih ing waluyo jati,
• Sanyatane donoroso kang utomo.

• Lamun Sujud, wataking satriyo luhur,
• Satriyo utomo,
• Angemban dhawuh kang suci,
• Njunjung asmo adege nuso lan bongso.

• Lamun Sujud, angudi adi sesunu,
• Jejering satriyo,
• Tuladhaning poro janmi,
• Awit wiji sinetir kanthi waspodo.

• Poro waro guno, anetepi wajib sujud,
• Sawengi sadino,
• Sepisan wus murakapi,
• Luwih sepisan dadi tambah utomo.

• Poro wargo iku, lamun sujud podho nutug,
• Pangudi miguno,
• Anjagi dhiri pribadi,
• Samyo jejeg begti mring Hyang Moho Kwoso.

• Sujud iku, dhawuhing Hyang Moho Agung,
• Tumraping manungso,
• Ing alam ndonyo puniki,
• Mung prasojo Sujud ipun Sapto Darmo.