Sekar Pangkur Pengiring Sujud Sapto Darmo

Sekar Pangkur punika, kula aturaken ing pangangkah kejawi kagem Pengiring Sujud, ugi sageto nambahi pangertosan, lan methik manfaat ipun, menggah ipun wargo Kerohanian Sapto Darmo ing pundi papan.

• Pojokan nginggil puniko.
• Cahya sinar-ing Hyang kang Moho Adil.
• Tanpo Sinar kito lampus.
• Manungso Linimputan.
• Mulo wajib ngluhurke Hyang Moho Agung.
• Mumpung maksih ono ndonyo.
• Begjo kang wus angabekti.

• Pojokan kiwo puniko.
• Perantara pan saking ibu kami.
• Pojok tengen ramaningsun,
• Pojok ngandap puniko.
• Sari bumi kadhahar romo lan ibu.
• Banjur manunggalke karso.
• Njobo njero lahir batin.

• Ijem sepuh ing pinggiran.
• Lambang wadhag-iro manungso neki.
• Ijem moyo nglebetipun.
• Asal kito tritunggal.
• Romo ibu Cahyaning Hyang Moho Agung.
• Ngertenono pro manungso.
• Asalmu barang kang suci.

• Mulo siro ngupoyoa.
• Asal suci baliyo marang suci.
• Ora kaduwung ing mbesuk.
• Maksute segi tiga.
• Nggadhahi pojok tigo ping tigo niku.
• Bolongane ono songo.
• Nemo sepuh alit sami.

• Sumonggo sareng angetang.
• Mripat kalih talingan inggih kalih.
• Setunggal dumunung tutuk.
• Kalih wonten ing ngandhap.
• Sedasane sampun tinutup mbun-embun.
• Ingaranan kembang pundak.
• Mublak pethak paran karsi.

• Opo kang lambang bunderan.
• Abang ireng kuning kalawan putih.
• Kahanan buwono iku.
• Anyakro manggilingan.
• Pro wargo wajib nggayuh bebuden luhur.
• Reresik jagat priyonggo.
• Asal suci wangsul suci.

• Warni cemeng aluamah.
• Asaliro kang howo cemeng anenggih.
• Dayaning howo kang beku.
• Yen mangandiko awon.
• Lamun den umbar angrusak jagat agung.
• Lir panah lepas gendhewo.
• Kang katrucut tanpo wening.

• Warni abrit ku amarah.
• Asaliro saking talingan nenggih.
• Pangrangsang-ing swanten wau.
• Nimbulaken raos muntap.
• Jalaran mboten cocok ing karsanipun.
• Icale sipat kang awon.
• Yen kapimpin Mohosuci.

• Warni kuning pepenginan.
• Doyo medal saking paningal neki.
• Kang gumelar lan dinulu.
• Lamunto tinurutan.
• Jagat sakisine kauntalo wantun.
• Nanging ojo pingin olo.
• Nggayuho jujur lan suci.

• Putih iku mutma’inah.
• Doyo petak saking grono anenggih.
• Nampi nur Hyang Moho Agung.
• Menawi anggondo awon.
• Lajeng tinutupan ing bolongan ipun.
• Amargi grono waskitho.
• Mangerti olo lan becik.

• Sipat ingkang kaping tigo.
• Ageng aliting bunderan puniki.
• Pitedah ing watak ipun.
• Lamun iku sang grono.
• Njumbuhken asaling manungso rumuhun.
• Tinutupan gambar Semar.
• Pudhak sinumpet wastani.

• Mbun-embun iku Nur Cahyo.
• Ugi sinebutan Hyang Moho Suci.
• Pramilo menawi Sujud.
• Mring Hyang Moho Kuwoso.
• Rokhani kito manunggal gyo gupuh.
• Lan antuk nugrahaning Hyang.
• Ayem tentrem ing pakarti.

• Semar iku pono kawan.
• Trah pidarak-an kang tansah angabdi.
• Ngembani satryo luhur.
• Yo lajer tanah jowo.
• Nadyan olo ing rupo bebasanipun.
• Nanging Dewo ngejowantah.
• Lan wenang nuntut Hyang Widhi.

• Semar maksud nuding ngarso.
• Bilih Allah wonten namung sawiji.
• Moho Wikan Moho Agung.
• Sipat langgeng waseso.
• Nguwasani buwono saisinipun.
• Ugo klebu pro manungso.
• Den waseso ing Hyang Widhi.

• Semar nggegem asto kiwo.
• Angupoyo tirto perwitosari.
• Angregem rosou kang luhur.
• Dharahing morotopo.
• Andono ware miwah rembesing madu.
• Dedono sadino-dino.
• Ngethiyo ngendiko manis.

• Tegese Semar kalungan.
• Misahake sirah badan puniki.
• Lamun Sujud iro lulus.
• Sasat biso sampurno.
• Sesajine Candhi Saptorenggo niku.
• Pratondho manunggal mring Hyang.
• Jumbuhing kawulo Gusti.

• Semar nyengkelit pusoko.
• Sapdaniro kang landhep den wrangkani.
• Tansah wening tansah luhur.
• Sakecap lan pangucap.
• Datan cacat saking bap tangeh katrucut.
• Iku kekudanganing wang.
• Dadiyo tepo palupi.

• Semar akekampuh gangsal.
• Sesipatan pancasilaning Hyang Widhi.
• Ji Allah Hyang Moho Agung.
• Dene kaping kalihnyo.
• Allah Hyang Moho Rokhim yeku sinebut.
• Dene kang kaping tigo.
• Allah Hyang kang Moho Adil.

• Dene sipat ping sekawan.
• Allah Hyang Moho Waseso Sayekti.
• Mulo manungso satuhu.
• Mung kinaryo sarono.
• Nindakake dhawuhe Hyang Moho Agung.
• Dene sipat ingkang gangsal.
• Moho Langgeng uningani.

• Langgeng iku datan owah.
• Yen Rokhani datan kenaning pati.
• Mesthi wangsul asalipun.
• Nanging jamaniniro.
• Owah gingsir ajur lebur nggondo busuk.
• Yen wus podho pepisahan.
• Asal bumi mulih bumi.

• Ugo tinulisan jowo.
• Napsu budi kaping tigop pakarti.
• Dene napsu wit kang thukul.
• Nggambarake manungso.
• Uripe mung mangan pikirane beku.
• Ora ngudi mring kotaman.
• Contone oyot puniki.

• Dene kang kaping kalih nyo.
• Budi getaran kewan den wastani.
• Luwih inggil timbang napsu.
• Amargi saking kewan.
• Mbelani lan ngopeni turunanipun.
• Dedono marang manungso.
• Nadyan tanpo akal pikir.

• Lajeng kados pundi kito.
• Anggadhahi napsu budi lan pakarti.
• Mulo kito titah luhur.
• Wenang murbo waseso.
• Marang isen-isen alam sadarum.
• Nanging ugo kawaseso.
• Elingo uripmu iki.

• Tigang ndoso tinutupan.
• Sekar pangkur ganti sekar kinanthi.
• Gantine wewarah pitu.
• Kang tinulisan jowo.
• Sapto Darmo dumung ono ing simbu.
• Lan tulisan tanpo papan.
• Ugi sarengan sesanti.